Tras da Corda (Carlos G. Reigosa) Xerais Edicions Narrativa

Estes relatos de Carlos G. Reigosa son unha realidade auténtica e constante. Neles hai tensión narrativa, paixón levada ós límites, humanas cobizas e fraxilidades, temple de heroe ás veces... Adivíñase ás claras o esforzo introspectivo do narrador, mentres vai burilando os personaxes e urdindo situacións, sen que a liberdade na inventiva estrague a coherencia ou a verosimilitude (...). O narrador forxa unha prosa fluída de alta transparencia semántica, de autenticidade inobxectable.

VALENTÍN PAZ-ANDRADE Admirable libro de narracións de Carlos G. Reigosa. ÁNXEL FOLE.

Libro de estilo directo no que Reigosa nos traslada á súa Corda natal para facernos copartícipes da vida e milagres duns personaxes que sen dúbida son os heroes e heroínas dunha mitoloxía tan persoal como entrañable e inesquecible. ALFREDO BRYCE ECHENIQUE.

Todos levamos un pequeno paraiso dentro. O paraiso da memoria e da infancia, os antigos soños, as primeiras historias, as vellas paisaxes que seguen dentro de nós e nos acompañan sempre. A Corda é unha serra das terras do norte de Lugo , alén das paisaxes cunqueirianas de Mondoñedo, "serra de andar de vagar, sen présa", di o autor, "para que os homes, pola meditación da natureza, se aveñan e amiguen consigo mesmo e co seu destino". Paisaxes e historias da montaña de Lugo, da Galicia interior e profunda. Viaxe sentimental á infancia do escritor, que consegue aquí os seus máis altos rexistros literarios, momentos de emoción poética realmente sobranceiros."O tesouro de Pedro Xesto", "O milagre que lle pasou ó Eladio", "A xustiza da Madriña", etc, son historias que nacen da experiencia, do vello mundo do relato oral, da antiga memoria que, como dicia o poeta Ri1ke, é a patria do home. Un libro especialmente recomendado para os amigos da nosa literatura.